Um Heilsuhöndina
Jóna Ágústa stofnaði Heilsuhöndina árið 2007 þar sem boðið er upp á hómópatíu og aðra heilsutengda þjónustu/ heilsu- og óþolsmælingar, orkujöfnun, fyrirlestra, námskeið og heilsuvörur. Sérstök áhersla er lögð á heilsufrelsi. Vefsíðan www.heilsuhondin.is var opnuð um mitt síðasta ár og þá er boðið í fyrsta skipti á Íslandi upp á hómópatíuþjónustu í gegnum netið sem ég kalla "Hómópatía heim" í þeim tilgangi að ná til þeirra sem eiga um langan veg að fara eða þurfa skyndihjálp. Heilsuhöndin ehf. hefur bækistöðvar í Reykjavík og á Akranesi og sendir hómópatískar remedíur um land allt með viðeigandi leiðbeiningum.
Jóna Ágústa stundaði nám í hómópatíu við The College of Homeopathy í London sem hún lauk árið 2000. Hún var einn af stofnendum Heilsuhvols árið 2001 og hefur starfað þar frá upphafi en hætti starfsemi þar í maílok 2010.
Um Jónu Ágústu
Ég fæddist á Akranesi 1957 dóttir Ragnheiðar Líndal Hinriksdóttur og Gunnars Jóhannessonar. Frá Akranesi flutti ég 9 mánaða gömul og er nú loksins komin heim aftur hálfri öld síðar! Flutti síðastliðið sumar í Jörundarholt 158, yndislegt hús sem við köllum Hjartastað. Langamma og afi bjuggu í Reynistað og þar var ég oft á bernskuárunum. Langalangafi minn Sigurður Jónsson var hómópati og ég er stolt af því að feta í fótspor hans.
Fjölskylda
Ég er gift Freysteini Jóhannssyni blaðamanni og á tvö uppkomin börn þau Sjöfn Elísu og Atla Þór. Barnabörnin eru 6 á aldrinum fjögurra til átján ára. Ég byrjaði að búa 17 ára gömul og vann í tvo áratugi á Morgunblaðinu en fertug 1997 söðlaði ég um og flutti til London og lærði hómópatíu. Áður hafði ég lært Svæðameðferð árið 1987 og ítarlegra nám í Svæðameðferðarskóla Íslands 1990-1991. Á 30 ára afmæli Svæðameðferðarfélags Íslands 29. apríl 2008 var ég gerð að heiðursfélaga sem mér þykir vænt um. Ég útskrifaðist í október 2000, stofnaði Heilsuhvol ásamt fleirum í ársbyrjun 2001 og hef síðan þá unnið eingöngu við hómópatíuna til ársins 2009 að ég bætti við mig höfuðbeina- og spjaldhryggjarmeðferð á fótum hjá Dr. Martin Faure Alderson og hef unnið við svæðameðferðina samhliða hómópatíunni. Þá styrkti ég Ljósið veturinn 2010 með sjálfboðavinnu við að nudda en Ljósið er endurhæfingar- og stuðningsmiðstöð fyrir krabbameinsgreinda og aðstandendur þeirra.
Sérstök áhersla er lögð á heilsufrelsi.